من هو العدني

العدني... !!
العدني ..اي آدمي او آدمية ولدوا بعدن..و ولدوا لأبوين مولودين بعدن أو عاشوا اغلب عمرهم بعدن..

وعلى كذا فالعدني ممكن يكون من اي مكان من اليمن ..فممكن يكون حضرمي او جبلي او يافعي او حجري او زبيدي او لحجي او بدوي او أبيني او ضالعي او صنعاني.

وممكن كمان يكون العدني مش من اصل يمني ممكن يكون مكاوي او مصري او صومالي او دنكلي او هندي او كشي او كوكني او فارسي او حبشي او جاوي.
ويختلف سكان عدن في دياناتهم , فالغالبية العظمى مسلمين بمختلف المذاهب وتوجد أقليات يهودية وبهرة وبينيان ونصارى...

وكان ملاحظ ان عدن زمان ماكانش فيبه الانتماءات المناطقية كما الان , كانت مدينة كوسموبوليتان مدينة متعددة الاعراق والالوان بس تجمعهم لهجة واحدة ولبس واحد وعادات وحدة..

والعدني يسكن مدينة عدن ...بجنوب شبه الجزيرة مابين دارسعد والعلم وراس عمران..أو مغترب بركن من اركان العالم.

والعدني بطبعه انسان نظيف يحب يتغسل من ثلاث الى اربع مرات باليوم...وبعد الغسلة لازم يصلح بوتر صيني عشان الحرارة ..ويحب كمان يتعطر ..ويشل بجيبه مصر (منديل) أو توال صغير عشان الرشح(العرق).

والعدني يلبس فوطة اندونيسي يا قطن يا حرير..ويربط فوق الفوطة كمر وفوق راسه كوفية زنجباري..وصندل ماركة باتا ,وفوق كتفه مشدة رشوان...
والعدنية تلبس شيدر وتحت الشيدر درع وفوطة وتربط راسها بمنديل وتصلح فوق وجهها خنة ملون .بس مش معناته انه العدني دقا قديم. لا..
اي موضه تنزل بالعالم بتلاقي اول واحد جربه العدني سواء كان سروال جينز ولا قصة شعر ولا عباية موضة جديد...
كما تشتهر بعمل البخور والأخضرين.

والعدني الهودار..لازم معه باكورة محناية ومملسة بصليط ..عشان وقت المدارجة (المضرابة) تطحوص بيده ويهب فيبه من شق وطرف...والعدانية بطبعهم هودار حق مدارجة وحق ثلول وتنتهي المضرابة لمن واحد يسدح التاني , والمضرابة راس براس يابالساحل او بالمجنة ..واول مالعدني يشب قليل يروح الساحل يتعلم السدح مع اصحابه...ويا سدحنا ويا سدحته...

والعدني بطبعه فنق وقلبه اخضر ويحب السلا _وعلى صعوبة العيشة بعدن_ العرسان والمخادر والزقرات وحفلات الغسل والصبحية ولا تخلص ..ومعاكم اربعين الجاهل (أجروا ورانا) ..وحفلات الخطوبة والعقد وشوهة ستنا خديجة والمواتاة والفولات..و..و..و ..

الخلاصة انه السلا بعدن مستمر ولا يخلص..ماشاء الله

كمان العدني..يتقرع(يفطر) خمير او خبز طاوة او كبن او جبيز او لحوح او روتي وزبدة وجام مع قلص شاهي احمر أو ملبن..

ويتغذي رز وصانونة وصيد طاوة مع الشتني ..
ويحلي بحلاوه صوري او خلطه وهريس او عنبه ضوبيا او عنبه عظام...
ويتعشي فاصوليا مقلوب على روتي وقلص شاهي...

طبعا ذا بالعادة مش معانته انه ماياكلوش حاجة ثاني..مليان اكل بعدن , والطبيخ والنفيخ بكل بيت

والعدني يحب المناجمة ويحب النكت واللواعة ...ومع كل كلمة تقوله لازم يجيب لك لكاعة جديد وضحك .ويحب كمان المشامقة بلقفه والتعليق على كل حاجة .

والعدني..كمان لسانه بليط..يعني مع كل كلمه بتسمع عارو حريمو...بس تخرج من قلب صافي مش حق خباثة....

والعدنية بطبعه صياحية وتحب اللوك والنجرة...ولو يجزع يوم بدون ما تسمع وحدة من حريم عدن تصيح ادري انه ذاك اليوم المرة مريضة بالحنجرة ما تقدرش تهدر هههههه

والعدني يحب يلعب دمنة وبطة(ورق) ويحب يتفرج ويحلل الأخبار ويحب كمان انه يناجم اصحابه على مبارايات الكبة(الكرة) ..ولو جزعت مبارة بدون مناجمة ..ادرو محد تفرج ديك المبارأة

والعدني بطبعه يحب التنبل الحالي والمر مع رشة عطر والزردا والسوكا..والعدنية تحب الفوفل الملبس والاقرام و وفوفل شمس وفوفل حشيش مجموع ولبان لعيص ...وهبله من الديش

والعدني بطبعه يخزن بمبارز ما يخزنش بالاركان وبالشوارع...وبطبعه يلف القات بتوال ولا مرقحة مبلوله مي ...ما ياكلش القات من العلاقي ..وبطبعه كمان يغسل القات قبل ما يخزن...ويجزع معه دبة مي بالهيل ...
والقات بالمناسبات فقط على نغمات بامخرمة ومحمد جمعة خان

والعدني...يحب الرحلات ويحب يروح البحر مع أصحابه يبيتو بالغدير ولا ابو الوادي ولا دنافة ولا فقم وعمران يسهرو على جمد هندي ويجلبو صيد وابو مقص وبنجيز...
والحرمة العدنية تشل عيالها وتخرج مع حريم الحافة او الأهل ويتمشوا

ولمن تزور مريض أو صديق تجزع معاك قرورة فينتو أو مانجو راني وقصع عنناص وبسكت , وأهل البيت يقربولك خمير وبطاط أو غريبات وكعك مع الشاهي الملبن او ساكت وزعقى ولوز

وإدا بيت معو عرس أو مولود جديد أو موت لاقدر الله الحافة تقتلب فوق تحت , وكل الجيران يوقفوا مع بعض,,,

"وذي مشاهادات شخصية مختصرة عن عادات وتقاليد العدانية "

» الكلام العدني احلى من العسل